วาสนาบ่เหงี่ยงคล้อย   ถอยต่ำไปตามกาล

แต่ว่ามารในใจคน  สิก่นหลุมฝังซุมเจ้า

ลางคนเผาตนเล่น เห็นตัณหาว่าแม่นม่วน

กวนตมขุ่นเอ้เล้ โหลดเซข้างหย่างบ่ตรง

ฝรั่งเขาส่าโป้งโป้ง ธรรมสูงเจริญดี

มีใจใฝ่ธรรมพุทธ บริสุทธิ์บ่วางเว้น

เอาน้ำเย็นดับไฟฮ้อน บ่ได้สอนสิฮุ้อยู่

ฮีตแต่ปู๋แต่ปู้ คู่บ้านได้ผ่านมา

ฟังก่อนเด้อโยมป้า น้าบ่าวชาวนิกร

ให้ฮำฮอนตรองคิด พินิจธรรมนำแจ้ง

พอตื่มแสงกะบองไต้ ไปมาโพดดอกว่าง่าย

ตายไปบ่ต้องย้าน ผลทานยู้  สู่สวรรค์

มันหากมีหลายซั้น ปันแบ่ง  ไปตามบุญ

คือคนมีทุนหลาย นั่งสบายหายฮ้อน

สนุกนอนสนุกเทิ้ง เบิ่งคนในโลกลุ่ม

ผู้ตัณหาห่อหุ้ม ไฟกุ้มอั่งอุรา

ก่อนสิไปให้เบิ่งฟ้า โบราณว่าบ่ผิดหลัก

เติมเสบียงให้มันคัก บ่หนักหนาดอกนาท่าน

ฮู้จักทานฮู้จักเว้น ฮู้จักเวรฮู้จักปล่อย

ฮู้จักหย่างฮู้จักถอย ฮู้จักฮอยพุทธเจ้า บ่หลงเข้าดอกอุ่มเฟือย สาธุชนเอ้ย