ไปทางหน้า ขอให้มีชัย

ไปทางได๋ ขอให้ถูกหวยรวยโชค

ให้เจ้ามีเงินล้าน ทำงานมีตำแหน่ง

สนุกนอนนับแบงค์ แลงเซ้านับแต่เงินเด้อโยม

ได้โชคแล้ว กะอย่าลืมทำบุญเด้อ…

อย่าสุพากันหนี ให้วัดฮ้าง
ไปสู่ตะรางใหญ่ แออัด

ให้พากันเข้าวัด ฟังธรรม
พระสัมมาพุทธะ โคดมเจ้า

อย่าสุมัวเมาแน่น มัวเมา
กุมกระหม่อม หลายท่อนน

ให้ได้หาตอนซิ้น พระธรรมไว้
แว่นแยง เด้อ….

ชะยะตุ ภะวัง ชะยะมังคะลัง   น้ำอันนี้มีฤทธานุภาพ ไผได้ซิดได้อาบสิร่ำสิรวย
ซิดใส่หัวงัวหัวควยหัวซ้างหัวม้า ซิดใส่พ่อค้าแม่ค้าให้ซื้อง่ายขายดี
ให้ได้เป็นเศรษฐีรวยเงินรวยแบ๊งค์

ซิดใส่สตางค์แดง ให้กลับเกิดเป็นสตางค์ห้า ซิดใส่กองผ้าอ้อม ให้กลับเกิดเป็นกองผ้าไหมเงินไหมคำ ซิดใส่ของดำ  ให้ขาวไปเหมิดบ้าน ซิดใส่คนหัวล้าน 
ให้เป็นว่านเป็นยา ให้ผมดกคืนมา  เต็มหัวเต็มเกล้า
ซิดใส่ผู้ขี้ฮ้ายสิได้เป็นผู้ดี คือจังองค์พระศรีมาแต่ชั้นฟ้า
ซิดใส่คนผีบ้า ให้หายป่วยหายวัน

หายจากเคราะห์  จากเข็นโรคาพยาธิ หายทั้งโรคประสาท  จิตใจพิการ
อย่าสิมีมาพาน หายทุกข์หายโสก  หายโรคหายภัย เด้อ…

อันว่า บุญบุญนี้ บ่มีไผปุนแจกกันแหล่ว

บ่หอนแหกออกได้ ดอกคือไม้ผ่ากาง

คือจังเฮากินข้าว เฮากินเฮากะอิ่ม

บ่ห่อนไปอิ่มท้อง เขาพู้นผู้บ่กิน ซั่นแหล่ว….