ฮักษาศีลเอาไว้ ภาวันนาเฮ็ดใจเที่ยง

สลึงเดียวบ่ได้ซื้อ ให้เสียเงินซ้ำจังแม่นบุญ

สมถะวิปัสสนาพร้อม เป็นการไกลกิเลส

ละให้หลุดลดให้เกลี้ยง ผลได้แม่นนิพาน

ซื้อหวยนำพระให้  เสียซะซายหลายพันหมื่น

ฝันกลางคืนซื้อมื้อเซ้า  เงินสิกินข้าวจนบ่ยัง

ผัวฝันเมียกะฮ้าย  ตีผัวจนหัวไข่

เมียฝันไปเองแท้แท้  ยังวีค้อนใส่ผัว

หมู่เขาโฮจ้นจ้น   สวิงเขิงได้ปลาข่อ

แหเฮาใหญ่กะด้อ  หว่านงมพ้อแต่อีปิง     พี่น้องเอย

สาขาไม้ มีใบฮ่มกะต่าง

ฮ่มหนึ่งวิเศษแท้ เงาเงื้อมบัดแม่นโพธิ์

สาขาไม้ มีใบกะยังต่าง

ใบหนึ่งวิเศษแท้ ธรรมพระองค์เจ้าบัดอยู่ใน

โบราณให้ความหมายว่า ใบหนึ่งวิเศษแท้ ที่กล่าวถึงนั้น คือ ใบลานที่จารึกธรรมะของพระพุทธเจ้า

❖ ก่อนสิไปให้เบิ่งฟ้า    โบราณว่าบ่ผิดหลัก

เติมเสบียงให้มันคัก    บ่หนักหนาดอกนาท่าน

    ฮู้จักทาน ฮู้จักเว้น ฮู้จักเวร ฮู้จักปล่อย

ฮู้จักหย่าง ฮู้จักถอย ฮู้จักฮอยพุทธเจ้า 

บ่หลงเข้าดอกอุ่มเฟือย สาธุชนเอ้ย ๚ะ๛